ஊட்டச்சத்து குறைபாடு என்பது குழந்தை முதல் பெரியவர்கள் வரை ஏதோ ஒரு விதத்தில் அனைவருக்கும் ஏற்படுகிறது.
ஊட்டச்சத்து குறைபாட்டை வழிப்படுத்தும் அறிகுறிகள் இருந்தால் கூட ஒரு சில சத்துக்கள் குறைவாக இருப்பதை அவ்வளவு சுலபமாக கண்டறிய முடியாது அதேபோல பல சமயத்தில் உடலில் தோன்றக்கூடிய சின்ன சின்ன மாற்றங்களை கூட எளிதாக புறக்கணித்து விடுகிறோம். குறிப்பாக இரவில் தூங்கும் பொழுது ஏற்படக்கூடிய ஒரு சில மாற்றங்களை கவனிக்காமல் விடுவது மிகப்பெரிய ஆபத்தை ஏற்படுத்தலாம். உடலில் வைட்டமின்கள் குறைபாடு இருந்தால் கண்டிப்பாக ஒரு சில அறிகுறிகளின் மூலம் வெளிப்படும் அதேபோல ரத்த அணுக்களை உற்பத்தி செய்யும் முக்கியமான வைட்டமின்களில் ஒன்றான பி12 வைட்டமின் குறைபாடு இருந்தால் என்னென்ன அறிகுறிகள் ஏற்படும் என்று பார்க்கலாம்.
இரும்பு சத்து குறைபாடு போலவே வைட்டமின் பி12 குறைபாடும் பரவலாக அதிகரித்து வருகிறது. நரம்புகலை ஆரோக்கியமாக வைத்திருப்பது, சிவப்பு ரத்த அணுக்களை உருவாக்குவது, உள்ளிட்ட முக்கியமான செயல்பாடுகளுக்கு வைட்டமின் பி12 சத்து அத்தியாவசியமானதாகும். வைட்டமின் பி12 சத்து குறைபாடு, இரவு நேரத்தில், குறிப்பாக தூங்கும் நேரத்தில் ஒரு சில அறிகுறிகளை வெளிப்படுத்தும் பின்வரும் அறிகுறிகளை நீங்கள் உணர்ந்தால் உடனடியாக மருத்துவரிடம் ஆலோசிப்பது அவசியம் ஆகும்.
வைட்டமின் பி12 சத்து குறைபாட்டால் நாள் முழுவதும் சோர்வு, நரம்பியல் பாதிப்புகள், உடல் தளர்ச்சி, போன்ற அறிகுறிகள் ஏற்படலாம். பெண்களை விட, வைட்டமின் பி12 குறைபாடு ஆண்களுக்கு அதிகரித்து வருகிறது. நாள் முழுவதும் பரபரப்பாக இயங்கிக் கொண்டிருக்கும் நபர்களுக்கு, இரவில் சில அறிகுறிகளை பெரிதாக உணர முடியாமல் போகலாம்.
ரெஸ்ட்லெஸ் லெக் சிண்ட்ரோம் - கால்களை அசைத்துக் கொண்டே இருப்பது
தூங்கும் பொழுது சிலருக்கு கால்களை நிலையாக வைக்க முடியாமல் போகும். உதாரணமாக, அவ்வபோது கால்களை உதைப்பது, கால்களை அசைத்துக் கொண்டே இருப்பது; இவை வைட்டமின் பி12 குறைபாடு இருக்கிறது என்பதற்கான அறிகுறிகளில் ஒன்றாகும். இது உங்கள் தூக்கத்தை கெடுக்கும்.
வைட்டமின் பி12 குறைபாடு உடலில் ரத்த ஓட்டத்தையும் பாதிக்கும். இதனால் கால்களுக்கு பாதங்களுக்கு போதிய அளவு ரத்த ஓட்டம் இல்லாமல் போவதால், இரவு நேரத்தில் தூக்கத்தில் திடீரென்று கால்கள் மரத்துப் போகும் உணர்வு ஏற்படும்.
கால்கள் மற்றும் பாதங்களில் குத்துவது போன்ற வலி
இரவு நேரத்தில் முழங்கால் பாதங்களில் திடீரென்று குத்துவது போன்ற ஒரு உணர்வு ஏற்படும் அதேபோல பாதங்களில் எரிச்சலும் தோன்றலாம். இவை வைட்டமின் பி12 குறைபாடு அறிகுறிகள் ஆகும்.
தசைகள் பலவீனத்தால் கால்களில் தளர்ச்சி
படுக்கையில் இருந்து எழுந்து நடக்கும்பொழுது அல்லது இரவில் பாத்ரூம் செல்லும் பொழுது கால்கள் பலவீனமாக இருப்பது போல உணர்வீர்கள். கால்கள் தடதடக்கும், நடக்க முடியாதது போல தோன்றும். இது தசைகளின் பலவீனத்தைக் குறிக்கும். இதுவும் வைட்டமின் பி12 குறைபாட்டின் அறிகுறிகளில் ஒன்று.
தசைபிடிப்பு
வைட்டமின் பி12 நரம்புகள் ஆரோக்கியத்திற்கு மிகவும் முக்கியமான சத்தாகும். இந்த சத்து குறையும் பொழுது கிராம்ப்ஸ் என்று சொல்லப்படும் தசைப்பிடிப்பு உண்டாகும். கால்களில் கெண்டைக்கால் நரம்புகள், கால்களில் இருந்து இடுப்பு வரை நீளும் சியாடிகா என்ற நரம்பைச் சுற்றி, தசை பிடிப்புகள் ஏற்படலாம்.
தூக்கமின்மை
இது போன்ற பாதிப்புகளால், இரவில் ஆழ்ந்த தூக்கம் இல்லாமல் போகும். சரியாக தூக்கம் இல்லாமல் இருப்பது அஜீரணம், செரிமான கோளாறு, வயிறு உப்புசம் உள்ளிட்ட வயிறு சார்ந்த பிரச்சனைகளையும் ஏற்படுத்தும்.
வைட்டமின் பி 12 சத்து குறைபாடு மாரடைப்பு பக்கவாதம் மற்றும் தீவிரமான நரம்பியல் கோளாறுகளுக்கு வழிவகுக்கும் என்பதால் இந்த குறைபாட்டை போக்க மருத்துவ ஆலோசனை அவசியம். பி12 வைட்டமின் நிறைந்த உணவுகளை அதிகம் சாப்பிட வேண்டும். அசைவ உணவு சாப்பிடுபவர்கள் சிக்கன் முட்டை போன்ற உணவுகளில் இருந்து வைட்டமின் பி12 சத்தை பெறலாம் சைவ உணவு சாப்பிடுபவர்களுக்கு மருத்துவ ஆலோசனையுடன் சப்ளிமென்ட்டுகளை எடுக்கலாம். அதே போல ஸ்ட்ராபெரி, காரட், வாழைப்பழம் உள்ளிட்ட உணவுகளில் இருந்து வைட்டமின் பி12 சத்தை பெறலாம்.
Tags:
உடல் நலம்